Z Dešna/Dissen. Zachadnu njeźelu jo se pśi jadnab 30 stopnjow 15 źowćow a źewjeś rejtarjow w Dešnje pśed kjarcmu „Serbski dwór“ zgromaźiło, aby kokot swěśili. Wjele narskich woglědarjow jo na športnišću a na kšomje drogi gromadu pśišli, mjazy drugim samo turisty z Francojskeje. Pó zwuconych kupkowych fotach, jo se swěźeński pśeśěg z dujaŕskeju kapału nAund na drogu dał. Na športnišću su južo wrota na to cakali, až rejtarje chopiju rejtowaś. Źowća su na jawišću pśi kapale stojali. Na wrotach su wisali paleńcowe flaški, cigarety, ale teke słyńcna bryla a samo spódny zec. Jadnab 45 minutow pózdźej jo prědny kral jasny był. Marcus Noack, kenž jo ze swójimi fryšnymi 25 lětami nejstaršy rejtaŕ był, jo głowu kokota wótrył. Wón jo na kónju swójogo pśijaśela Marco Golaša z Bórkow rejtował, kótaregož jo w zajźonych lětach južo cesto dostał.