Z Chóśebuza/Cottbus. Zastojnske sudnistwo (Verwaltungsgericht) w Chóśebuzu musy se tuchylu a teke w dalšnem casu zaběraś z jadneju wěcku, ako jo za njo kradu nowe. Ga z tym, lěc jadna komuna pśisłuša oficialnje k serbskemu sedleńskemu rumoju abo nic. W lěśe 2017 ga běšo se nowo póstajiła a rozšyriła licba serbsko-nimskich gmejnow, jsow a městow w Dolnej Łužycy. Jich jo było dogromady wušej 40, ku kótarymž słuša hyšći bejna licba wejsnych źělow. Źaseś z nich jo pak ned skjaržyło, až njekśě byś w serbskem sedleńskem rumje.

Akle pěś lět pózdźej něnto a w pśiducych mjasecach zastojnske sudnistwo Chóśebuz wobźělonych kažo na wótpowědne sudniske jadnanja – komuny, ako su skjaržyli, a Ministaŕstwo za wědomnosć, slěźenje a kulturu, ako jo wobskjaržone. Pó tom, až běchu na sudnistwje južo 13. julija jadnali dla skjaržby gmejny Stara Niwa/Wózwjerch/Altzauche/Wußwerk (Casnik jo wó tom pisał), su něnto slědny tyźeń pětk, 25. awgusta, dalej wjadli dłujki rěd tych zjawnych a wustnych jadnanjow. Na nich su pśecej wobźělone skjaržece komuny, bramborske kulturne ministaŕstwo a Serbska rada.