Z Města/Cottbus. Pětk jo se zakóńcył w Starej płachtarni blisko Błośańskego dwórnišća w Měsće wuměłstwowy projekt „Wšykno jo krajina. Serbski mólaŕ Jan Buk“. Tam a w Serbskem muzeumje jo se pokazało wušej 70 mólbow z něźi 50 lět wuměłstwowego twórjenja nejwažnjejšego serbskego mólarja moderny – śichowobraze, portreje abo krajinowe wobraze Jana Buka. W katalogu se pśedstajijo jogo wobšyrne twórjenje. W Starej płachtarni su teke prezentěrowali ekspoziciju „Hommage à Jan Buck“ z twóŕbami młodych pólskich wuměłcow. Rěd zarědowanjow jo se pśewjadło: serbsko-nimsko-pólski swěźeń, kuratorske wjeźenja, wjeźenje pó měsće a druge. Město Chóśebuz jo było druga stacija wustajeńce „Wšykno jo krajina. Serbski mólaŕ Jan Buk“. Pśed tym jo wóna wiźeś była w Serbskem muzeumje w Budyšynje pśi góźbje 100. narodnego dnja Jana Buka (1922-2019). Jubilej jo dał póstarcenje za seriju w kulturnem casopisu Rozhlad „Kuždy wobraz jo nowy zachopjeńk“. Serbske awtory a awtorki su sebje wubrali wobraze Buka – a wót nich inspirěrowane su napisali basni abo krotke wulicowańka.