Z Chóśebuza/Cottbus. W lěśe 1861 roźony komponist Bjarnat Krawc jo 1942 dostał wót swójogo pśijaśela, wucabnika a spisowaśela Michała Nawki (1885-1968), baseń „Spiw wó wójnje“. W pśiducyma lětoma jo z toś togo a drugich tekstow w stawnej korespondency mjazy komponistom a spisowaśelom oratorium „Wójna a měr“ z 22 štuckami za solo a chor z klawěrnym pśewóźowanim nastał. W 75. lěśe smjerśi komponista Bjarnata Krawca jo Serbski ludowy ansambl (SLA) jomu k cesći prědny źěl wobźěłał a z pśidatneju inscenaciju rozšyrił, aby se dłymoki pśistup k śěžkej temje zmóžnił ale teke serbska muzika nimskorěcnemu publikumoju bližej pśinjasła. Dožywił jo dolnołužyski publikum toś to wósebne pśedstajenje ludowego ansambla zajźonu sobotu wjacor w źiwadłowem zalu chóśebuskeje Waldorfoweje šule, a jadnab 50 narskich pśiglědarjow jo pśichwatało. Krotko do zachopjeńka jo intendant ansambla Tomaš Kreibich-Nawka na jawišćo stupił, a jo pśibytnym wósebnosći, zaměry a slězyny wósebneje inscenacije rozkładował.