Z Budyšyna/Bautzen. Ako kužde lěto jo se na Reformaciskem dnju zmakało Serbske ewangelske towaristwo (SET) k swójej głownej zgromaźinje, lětosa w Budyšynje. W Michałskej cerkwi, kenž jo gromaźe ze Stareju wódaŕnju architektoniski symbol města a tradicionelna serbska cerkwja za wokolne jsy města, jo serbski superintendent Kristof Rummel źaržał nabóžninu. Pótom jo se 30 luźi na farje k słodnemu kafejpiśeju zmakało. Za tym jo rozpšawił Mato Krygaŕ, pśedsedaŕ towaristwa, w kótaremž jo 51 cłonkow, wó aktiwitach slědnego lěta: Tśi raze jo se zmakało jogo pśedsedaŕstwo. W Bukecach/Hochkirch su witali serbske wósadne w slědnem lěśe „Mobilny adwent“. Nowe spiwaŕske za źiśi a młoźinu „Zernička“ su měli teke we adwenśe pśed lětom swóju premjeru. W Hodźiju/Göda su spominali na fararja a maśicarja Jana Křižana. Na wěcejgeneraciskem Serbskem ewangelskem kóńcu tyźenja (SEKT) jo se pó jatšach zmakało 39 luźi, z togo 14 źiśi a 10 młodostnych, pód nawjedowanim serbskeje slěpjańskeje faraŕki Jadwigi Malinkoweje.