Chóśebuz/Cottbus. W ramiku serije zjawnych cytanjow „Open BTU“ jo se wótměł 8. nowembra wjacor k temje „Módrośišć, Zorja, muzika a wědomnosć“ w głownem campusu Bramborskeje techniskeje uniwersity Chóśebuz-Zły Komorow. W srjejźišću stej stojałej serbska kultura a serbska rěc ako wósebna gódnota w regionje.

Wěcej ako 60 pśisłucharjow jo se na tom tšojenju wobźěliło. Pśednosowali su wjednik wótźělenja za regionalne planowanje a šćit mjeńšynow Serbskego instituta dr. Lutz Laschewski, Maks Hasacki z Domowina Niederlausitz Projekt gGmbH (DomPro gGmbH), Gregor Kliem ze serbskeje redakcije rbb a Daniel Häfner z Plon GmbH – Łužyski institut za strategiske póraźowanje. Na tych styri pśednoskach jo šło wó nowe pógódnośenje serbskeje rěcy a kultury a potencial rewitalizacije serbskeje rěcy za Łužyski region.