Z Města/Cottbus. Pšašanje, na kótaru šulu mógu źiśi pó 6. abo samo 4. lětniku hyś, jo pšašanje z wósebnym wuznamom. Wjele wuknikow, wuknicow a starjejšych stoj rownycko pśed toś tym śěžkim rozsuźenim. Aby rozsud se wólažcył, jo se lětosa zasej źeń wótwórjonych źuri na Dolnoserbskem gymnaziumje pśewjadł. Zajmowane wukniki a wuknice su mógali pśez wjaže dundaś, šulu wuzgóniś a pšašanja stajiś. Pśi tom su wukniki a wuknice 12. lětnika małe kupki wjadli a jadnotliwe stacije pokazali. Na pśikład su we rumje za chemiju eksperimenty z palakami a wognjopraskotami na blidach pokazali. We wuměłstwowem ateljeju su se twóŕby wuknikow a wuknicow wustajili a w drugich rumnosćach su byli temy kaž serbska rěc w šuli, prědna-pomoc-kurs a wjele wěcej. Mimo togo jo se wótměło informaciske zarědowanje k pśechadnemu póstupowanju do wugbaśoweje a wobdarjeńskeje rědownje (LuBK) 5. How su mógli starjejše dobru góźbu wužywaś, pšašanja k tomu stajiś. Źowća 12. lětnika su pśi tej góźbje serbsku swěźeńsku drastwu nosyli a někotare druge wuknice pśi stacijach su we źěłowej drastwje chójźili.