Z Města/Cottbus. Wažna tema, z kótarejuž jo se Załožbowa rada Załožby za serbski lud slědny stwórtk na swójom pósejźenju w klubowni Dolnoserbskego internata intensiwnje zaběrała, jo pótrjefiła Ludowe nakładnistwo Domowina (LND). Rada jo se k tomu pśepšosyła Symana Cyža, wót 1. junija 2020 jadnarja LND, kótaregož prědna zastojnstwowa doba se kóńc maja 2025 skóńcyjo. Wón jo cłonkam rady wó situaciji w domje rozpšawił a jim pśedstajił wuwiśowy koncept za LND až do lěta 2029, kenž jo gromaźe z wótźělenjami nakładnistwa wuźěłał. Rozsuźiła jo Załožbowa rada, až se jogo dogrono wó dalšnych pěś lět až do lěta 2030 pódlejšyjo.

Direktor Załožy serbskego luda Jan Budar, kenž jo medijam wuslědki pósejźenja gromaźe z pśedsedarjom Załožboweje rady, Markom Kowarjom, prezentěrował, jo zwěsćił: „Atmosfera w nakładnistwje jo lěpša ako pśed lětom, jadnaŕ jo na pšawem puśu.“