Z Dešna/Dissen. Krajny raźc Sven Herzberger wokrejsa Dubja-Błota (LDS) ma tuchylu wjele nadawkow. Akle w pśedslědnem tyźenju jo wón był w Běłej Górje na kokośe – dla wušparanjow wokoło kokota z boka weterinarnego amta. Srjodu, 14. awgusta, jo wón pón do Dešna, do Domowniskego muzeja, ze swójeju zagroniteju za serbske nastupnosći Sabrina Kušyna se wudał. Do togo stej se hyšći nowu serbsku źiśownju w Nowej Niwje woglědałej a pótom do Dešna pśišłej, aby se ze zastupnikami serbskich institucijow zmakałej, je zeznałej a wó serbskich wobstojnosćach se rozgranjałej. Zmakanje w muzeju stej Kathrin Šwjelina, sobuźěłaśeŕka muzeja a cłonk Serbskeje rady w Bramborskej, a Dawid Statnik, pśedsedaŕ Domowiny, wótwóriłej. Rozgranjali su se nimski, tak až kuždy jo mógał kuždego rozměś, lěcrownož krajny raźc a Sabrina Kušyna južo pitśku serbski wumějotej. W pśijaznej zgromadnosći jo se wjele diskutěrowało. Jo šło wó kokot a Sven Herzberger jo zasej zawěsćił, až tak dłujko, ako jo w amśe, buźo kokot w jogo wokrejsu. Změny nałogow mógu jano wót serbskego luda samego pśiś a nic wót zwenkastojecych.