Z Janšojc/Jänschwalde. Njeźelu, 22. septembra, wuzwóliju w Bramborskej nowy krajny sejm. Aby Serbam lažčej padnuło se rozsuźiś, jo Domowina zběrała pšašanja, na kótarež su partaje wótegronili. Toś te na internetowem boce Domowiny wózjawjone wólbne kopolaki su byli zakład za wólbny forum w Janšojcach, na kótaryž jo Domowina wałtoru, 10. septembra, pśepšosyła. Jadnab 50 zajmcow jo pśichwatało, aby kandidatam Isabell Hiekel (MdL, Zwězk90/Zelene), Annett Bauer (Lěwica), Lars Katzmarek (SPD), Falk Peschel (BSW), Jeff Staudacher (FDP), Steffen Kubitzki (AfD) a Susanne Seng (CDU) pśisłuchali abo pšašanja stajili. Dawid Statnik, pśedsedaŕ Domowiny, jo ned na zachopjeńku w swójej nimsko-dolnoserbskej moderaciji napominał woglědarjow, w swójej maminej rěcy pšašanja stajiś. Nejžpjerwjej jo se wón pak sam kandidatow napšašował.