Ze Slěpego/Schleife. Njeźelu jo se w Serbskem kulturnem centrumje (SKC) Slěpe z banjawinym markom sezona nad gołym njebjom skóńcyła. 1.085 woglědarjow jo pśichwatało, a dokulaž jo był zastup za źiśi dermotny, by mógła licba wó dalšnych jadnab 500 małych woglědarjow wuša byś. A to njeglědajucy na za kjarmušu njerědne wjedro.

Pópšawem pśewjedu w Slěpem tradicionelnje kjarmušowy mark z jabłukoweju pśeglědku, ale pomologa Klaus Schwarz z Lubija (Löbau) jo južo w lěśu wótgronił, a team wokoło Sylwije Panošoweje jo se za banjawy rozsuźił. Nejwětšu banjawu jo ned sused SKC, Ronny König, sobu pśinjasł. Wóna jo wažyła 205 kilow a pokazali su ju na dwórje, rědnje nazymski wupyšnjonu. Njewócakano su se weto teke jabłuka mógli prezentěrowaś, pśeto pomologa jo dostał pśijaznu pomoc z Mecklenburg-Pśedpomorskeje. Pla partnarja jo směł jabłuka tergaś, wót kótarychž jo 70 družynow Slěpjanarjam k dispoziciji stajił. Pśeglědce banjawow a jabłukow w zalu SKC stej z tym raźona prezentacija nazymskich płodow wordowałej. 50 družynow banjawow jo pśišło z kněskego dwóra Něćin (Niethen) z Bukec (Hochkirch).