Z Města/Cottbus. Pyšny cas nazymy pśinjaso teke swěźeńske wjeraški z pyšnym programom. Tak su źiśi Witaj-źiśownje „Villa Kunterbunt“ 18. septembra dopołdnja ze šposom a nejlěpšeju myslu kokota łapali a skóro hyšći raz góźbu k wjasołemu swěśenju měli, ga pětk, 27. septembra, pśi kjarmušy. Drugi raz jo to był, až jo nosaŕ teje źiśownje, Serbske šulske towaristwo (SŠT), tam taku kjarmušu na nogi stajił. Teke jadnaŕ SŠT, Andreas Oschika, njejo se to dał wześ, na dwórje „wile“ sobu swěśiś.

Tradicionelne póstrowjenje z klěbom a solu su na tom wótpołdnju wuknice Dolnoserbskego gymnaziuma, serbski woblacone, na starosći měli. W serbskej a nimskej rěcy jo pón wjednica źiśownje Mila Zachariasowa tych gósći we wjelikej licbje na kjarmušy pówitała – a nic jano źiśi źiśownje „Villa Kunterbunt“ ze starjejšymi a starymi starjejšymi kaž teke něgajšne źiśi teje źiśownje, ale samo teke gósći ze žylojskeje Witaj-źisownje „Mato Rizo“, kótaraž jo pód samskim nosaŕstwom, źiśi z wětošojskego „Horta móžnosćow“ a z Europskeje šule Wilhelm Nevoigt.