Z Baršća/Forst. Teke we wokrejsu SPN su se lětosa žedne jsy wobźělili pśi wuběźowanju „Naša wjas ma pśichod“ (Unser Dorf hat Zukunft). Pśi tom ga źo głownje wó to, až se na wšaki part žywjenje pólěpšyjo a rědnjejše wugótujo za wše generacije.

Slědny tyźeń srjodu su na 3. pósejźenju nowego wokrejsnego sejma w Baršću pócesćili dobyśarjow togo tradicionelnego wuběźowanja. Ako nejlěpšu wjas su pócesćili Strjažow, ako twóri gromaźe z Dešnom jadnu gmejnu. Wót 100 móžnych dypkow su Stražojske dostali 85 dypkow, což jo zwěsćiła wósebna komisija, ako jo se rozglědowała w juniju we tej serbskej jsy.