Z Dešna/Dissen. Normalnje se wustajaju w Domowniskem muzeju w Dešnje twóŕby wuměłcow, kótarež se južo wjele lět kreatiwnemu twórjenju pśiwobrośiju a kótarež su južo we wjele wustajeńcach wiźeś byli. Pśi nowej wósebnej wustajeńcy, kótaraž jo se njeźelu w dešańskem muzeju wótwóriła, jo to pak hynac. Wóna dajo nas – tak ako titel to wugronijo – „nutś póglědnuś“, rozmjej nutś do wuměłskego twórjenja how na městnje, nutś do wobeju jsowu gmejny Dešno-Strjažow. Twóŕby 17 dešańskich a strjažojskich kreatiwnych se pokažu we tej wustajeńce – akwarele, wólejowe mólby, acrylowe wobraze, kreslanki, kolaže a wuźěła z běłeje gliny –, a te njejsu se do togo hyšći zjawnemu publikumoju pokazali. „K tomu słuša teke wjelika porcija skobodnosći“, jo groniła Babette Zenkerowa, wjednica muzeja, w swójej lawdaciji k wótwórjenju wustajeńce, na kótarež jo 50 luźi chwatało.