Z Města/Cottbus. Pśed dwěma lětoma jo se slědny raz zachopił Chóśebuski filmowy festiwal źeń do oficialnego wótwórjenja z filmowym wjacorom łužyskich amaterskich filmarjow w kinje Weltspiegel. Rěd pód titlom „Łužyska filmowa pśeglědka“ jo se pak pótom zakóńcył. Nowy kurator sekcije Heimat/Domownja/Domizna Daniel Kubik jo to za škódu měł a jo se wó to procował, aby se zasej filmowy wjacor za amaterskich filmarjow ako teke za filmowe kubłańske projekty pśewjadł. Z pomocu filmoweje seśi Łužycafilm a team filmowego festiwala jo wón toś mógł pětk, 1. nowembra, do Pisanego dwórnišća na filmowy wjacor Kaleidoskop pśepšosyś.