Z Města/Cottbus. Gaž Lodka – ta Serbska kulturna informacija – wugótujo swóje woblubowane a pśipóznate wósebne kulturne wustajeńce w klubowni Serbskego domu, pón se w nich pśedstajiju za wětšy źěl jadnotliwe mólarje a druge twórjece wuměłce (bildende Künstler). Rědko pak su to cełe kupki – wětše abo mjeńše –, ako mógu se how prezentěrowaś publikumoju. To móžo se teke groniś wó nejnowšej wustajeńcy, ako bu pśed dwěma tyźenjoma wótworjona a kótaruž móžomy se až do 10. januara pśiducego lěta woglědaś. Pód motom „Serbske krajiny / Sorbische Landschaften“ ga wiźimy how pśisamem 40 wobrazow wót dogromady 13 žeńskich a muskich z Dolneje Łužyce, ako we swójom wólnem casu raźi a z wjelikim wjaselim móluju abo kresle. To groni, až njejsu žedne „profije“, ale „amatery“.