Z Města/Cottbus. Pśi zgromadnem pósejźenju wuběrkowu za twarjenje a wobchod a za kubłanje, sport, kulturu a serbske nastupnosći města Chóśebuza, zachadnu srjodu wjacor w Ludwig Leichhardtowem gymnaziumje, jo paleca tema k wótgłosowanjeju na dnjownem pórěźe stojał: Pówušenje śěgowosći dalejwjeźecych powšyknje kubłańskich šulow w nosaŕstwje města, a to wót pśiducego šulskego lěta 2025/2026 pó casu njewobgranicowane. Pótrjefjony jo mimo cełkowneje šule Fontanego a gymnaziumowu Leichhardta a Steenbecka tek Dolnoserbski gymnazium ze swójim wósebnym serbskim profilom. Město planujo tu až do togo tsiśěgowu šulu na styriśěgowu rozšyriś. To by serbski profil šule bejnje wobgrozyło.