Serbska reja njejo wšedna folklorna kupka a jeje cłonki teke njejsu jano gerce. Serbska reja jo wósebny format za soburejowanje, za wuknjenje serbskich ako teke drugich rejow z Europy. Wóna pak njejo kšuty rejowański kurs, ale pśepšosyjo luźi z wjaselim sobu gótowaś a rědny cas z muziku a reju w dobrej a spódobnej zgromadnosći dožywiś. Južo połtera lěta organizěruju cłonki Serbskeje reje skóro kužde pónjeźele wjacor teke wótwórjonu źěłaŕnicku Rejowański dom Łužyca w Chóśebuzu, na kótarejž raz wob mjasec live zagraju, z cilom, toś to kulturne derbstwo dalej dawaś. Ale lětosa ma Serbska reja mimo togo něco wósebnego prědk, ga swój 10. jubilej swěśiś. Za to su Serbski dwór skazali, a to, ako zwucone, wót zeger 19:00. Ku tej góźbje jo redaktorka Katalin Porackojc se rozgranjała ze załožeńskim cłonkom, z Gregorom Kliemom, aby wěcej wó załoženju kupki, wó motiwaciji a wó cilu entuziastow folklorneje muziki a reje zgóniła.

Kak jo k załoženju Serbskeje reje pśišło? Jo dało take něco ako inicialne zapalenje?