Mało dnjow pśed progom lěta jo mógał Juro Gera (Jürgen Gehre) kšasny jubilej swěśiś, ako jo gromaźe z cłonkami familije, pśijaśelami a towarišami na 80 žywjeńskich lět slědk glědał. Krotki cas pózdźej jo se zmakał ze swójim dobrym znatym (našym awtorom Georg Zielonkowski) na rozgrono, kótarež jo se dla dłujkolětnego znaśa wjelgin pśijaśelnje wjadło…

Juro, jo se pla Tebje něnto ako 80-lětny w slědnych tyźenjach něco změnił?

Zasadnje nic, ale toś ta licba jo južo wósebna. Gaž se śělnje hyšći póměrnje na cajku cujoš, móžoš pak spokojom byś. To njejo mě razka sromota, až mjaztym kompletnje se wzdajom crjejow ze šnorkami. Dlej se zechyliś njejo mě spódobne, togodla preferěrujom crjeje z badakojtym pśipinanim.

No derje, gaž to wšykno jo! Gaž glědam na Twóju lisćinu narodninskich gósći, póznajom, až pśecej hyšći rad se do towaristwa dajoš…

To pśitrjefijo. Njamógu a njok doma w sedle sejźecy zestarjeś a ako wjerašk dnja na zwónjenje librowarja „jěze na kólasach“ łakaś, raz tak pśegnawajucy. Z radosću woplěwam móje kontakty a pśez to hyšći derje na žywjenju se wobźělijom, to jo pšawje.