Ze Slěpego/Schleife. Za zastojnstwowe zjadnośenje (Verwaltungsgemeinschaft) Slěpe dej dłujkodobny wuwijański koncept nastaś. Wón dej zgromadna pśichodna wizija pó górnistwje byś. To su pótrjefjone šołty Jörg Funda (Slěpe), Sebastian Bertko (Dźěwin/Groß Düben) a Robert Sprjejz (Trjebin/Trebendorf) w aktualnem wudaśu amtskego łopjena pódšmarnuli. Srjejźišća su te temy kubłanje, wěda, wóda a energija. Pśi tom sajźiju toś te tśi gmejny na intensiwne gromaduźěło ze susednymi komunami. Nastaś dej koncept gromaźe z wobydlarjami.

Slězyna jo: Wobstojecy koncept z lěta 2006 se dla změnjujucych ramikowych wuměnjenjow wobźěła a dalej pišo. Cel jo, perspektiwy góspodaŕskego wuwiśa pó brunicy pokazaś. Specifiske potenciale tśich gmejnow Slěpe, Dźěwin a Trjebin deje se zaplasć. Wósebny kapitel pśi naźěłanju koncepta pśiwobrośijo se Serbam. Pśi tom źo wó ideje k rewitalizaciji a zmócnjenju rěcy a identity, k wuchowanju tradicijow a nałogow a k žywej serbske kulturje.