W starej ZRN njejsu wót šulow abo zawodow organizěrowane prozninske graśa abo lěgwa znate byli. Ewangelske cerkwje su młodostnym wólne case za młoźinu (Jugendfreizeiten) póbitowali. Ewangelske cerkwje NDR su město togo wukšuśenja (Rüstzeiten) zarědowali. Źěl takich zarědowanjow su teke woglědy źiwadła, muzejow abo drogowanja pó pśiroźe byli, w srjejźišću pak njejo wólny cas stojał, ale kšuśenje kśesćijańskeje wěry młodych luźi. Na jadnom takem wukšuśenju som se wopóznał w 1980tych lětach z fararjom za młoźinu na kraju (Pfarrer für die Jugend auf dem Land) Wolfgangom Reinom z Fehrbellina. Dokulaž stej pó 1990 licba kśesćijanow a financielne pódpěrowanje pódwjacornych ewangelskich cerkwjow za pódzajtšne cerkwje kradu wóteběrałej, jo Ewangelska cerkwja Barliń-Bramborska wšykne głownoamtske městna pśepytowała a se w lěśe 1995 rozsuźiła, až toś to městno za młodych luźi na jsach a w małych městach njejo dalej trjebne. Wolfgang Rein jo wóstał wósadny faraŕ we Fehrbellinje a ako něntejšny wuměńkaŕ pśiwzejo hyšći někotare namše a wugótowanja wukšuśenjow za dorosćonych.