Chóśebuz/Cottbus. K comu dej serbska rěc dobra byś? Take pšašanje słyšy se z casami, teke wót serbskich luźi. Wetom ak jadne na serbskej wucbje cwibluju abo se jej wu­směwkuju, wopruju lubowarje a entuziasty serbskeje rěcy młogi raz swój urlop a wudaju se na daloku drogu, aby ju pówuknuli. Góźbu k tomu dawa jim Šula za serbsku rěc a kulturu, ak organizěrujo kužde lěto w lěśu kompaktny kurs serbskeje rěcy. Na tom lětosnem, ak jo se pśewjadł zachadny tyźeń, jo se wobźěliło 44 kursistow – wjele wěcej nježli we pjerwjejšnych lětach.

Chto su te kursisty a co jich góni k takemu wuknjenju? Někotarych smy se wopšašali: To su wjelgin wšake luźe ze wšakeju motiwaciju. Günter Pawliš (73), pśedsedaŕ Domowinskeje kupki w Złem Komorowje, jo južo šesty raz (!!!) pódla. Smartphone a internet njejstej w jogo generaciji wjelgin rozšyrjonej, wón pak nałožujo tu nowu techniku pśi wuknjenju serbskeje rěcy. Pśi serbskem rozgronje póglědujo stawnje na display a pyta słowa w online-słowniku. Wón móžo mjazy tymi złykomorojskimi Domowinarjami serbsku rěc nejlěpjej, a cesto na zmakanjach jo jich „ceptaŕ“.