Zjawnych tšojenjow zwenka šule, źož młoźina by měła góźbu se serbski rozgranjaś a serbsku rěc regularnje nałožowaś, njejo zewšym mało. Ale te móžnosći wužywaju se pśeliš rědko, pśeto młoźina se za nje wětšy źěl njeinteresěrujo. Bźez takeje interese pak njebuźo institucionelna pódpěra pśi rewitalizaciji serbskeje rěcy wjele pśinjasć. Tu mysl jo wugronił wjednik Rěcnego centruma Witaj w Chóśebuzu dr. Viktor Zakar we slědnem wudaśu pedagogiskego casopisa Serbska šula, w nastawku Góźby za wužywanje dolnoserbšćiny we wólnem casu a pórucenja k pólěpšenju póbi­towanjow.