Sven Vogt źěła kuždy tyźeń wót wałtory do stwórtka w Domowniskem muzeju Dešno, pónjeźele a pětk w Grodku. Grodkaŕ koordiněrujo źěło „Łužyskeje muzejoweje krajiny“. Mjazy drugim co brošurku „Zeitreise“, kótaruž w rukoma źaržy, nowo wudaś. Wóna pśedstajijo wšykne muzeje togo zwězka. Kněz Vogt aktualizěrujo teke internetny bok „Łužyskeje muzejoweje krajiny“. 
Dešno/Dissen. Južo wót februara mógu woglědarje dešańskego muzeja nowe woblico wuglědaś. Sven Vogt jo tśi dny we tyźenju tam: wót wałtory až do stwórtka. Ten 52lětny Grodkaŕ jo ten nowy koordinator za zwězk muzejow we wokrejsu Sprjewja-Nysa: „Łužyska krajina muzejow“.
Jogo głowny nadawk jo organizacija muzejowego zwězka. Za to źěło ma teke we swójom grodkojskem běrowje cas, źož jo kuždy tyźeń pónjeźele a pětk. Se wě, až organizěrujo teke noc muzejow sobu.
Jaden wót jogo nejwažnjejšych nadawkow jo wobźěłanje a aktualizěrowanje internetnego boka www.lausitzer-museenland.de. Tam njejo wšake na aktualnem stawje a kšac pó kšacu wugótujo ten koordinator, kótaryž jo popšawem twarski inženjer, ten bok tak, ako dej byś. K tomu jo teke wuski kontakt ze wšyknymi tych 44 muzejow notny. Na pśikład muzej w Mósće njejo bóžko wěcej pšawidłownje wótwórjony, za to wobźělijo se nowo wótwórjony muzej na chóśebuskem lětanišću. Ale na lětanišću w Drjejcach se tuchylu wjele njetšoj. To wšykno dej wón pla luźi pśi městnje wuzgónjowaś a pón do interneta zapódaś.