Na fośe wótmólowane su źowća ze jsow Matyjojce/Mattendorf, Trjebejce/Trebendorf a Gari/Gahry. Ta žeńska jo Fräulein von Natzmer, źowka tamnego kněza. Wóna jo měła z tymi źowćami kružk rucnego źěła. Ako jo se 1907 do Barlinja wóženiła, jo toś to foto pśi rozžognowanju nastało. Fota: archiw Piosik 
26. oktobra jo wobradował wuběrk za serbske nastupnosći wokrejsa Sprjewa-Nysa we Gózdu/Gosda pla Baršća. Gózd jo wejsny źěl gmejny Łukojce/Wiesengrund a tamny šołta Egbert Piosik jo swóju gmejnu pśedstajił. K tomu ale pózdźej.
Głowny tema tśigóźinskego wobradowanja jo był serbski sedleński rum. Južo pśed tym su měli klawzuru, aby nejpjerwjej sebje stojnišćo wuźěłali, kak z tym wobchadaju. Wuběrk ga njamóžo nic rozsuźiś, móžo ale krajnego raźca Altekrügera pódpěraś, kótaryž dej Bramborskej stojnišćo wótedaś. Su se intensiwnje zaběrali ze wšyknymi pšosbami. Wósebnje su se dla togo wjaselili, až wšuźi su byli luźe, kótarež su se wobźělili pśi wuzwólowanjach za Serbsku radu. We tom su toś te luźe pokazali, až cuju se ako Serby.