Dr. Frido Mětšk by swěśił lětosa 4. oktobra swój 100. narodny źeń. Jo pak južo w lěśe 1990 wumrěł. Jogo mě jo serbskim luźam znate, ale co dokradnje za nim štycy, to wě jano gjarstka wědomnostnikow. 28. oktobra jo se wjele k tomu wuswětliło we jadnom zarědowanju Spěchowańskego towaristwa za Serbski muzej Chóśebuz. Jogo žywjenje a statkowanje su w pśednoskach pśedstajili Roland Marti, Pětš Janaš a Franc Šěn. Ako zarědowarka jo Madlena Norbergowa referat k jogo žywjenju źaržała. Teke wjele fotografijow su pokazali. Wjelicka wósebnosć jo była, až su wótegrali samo głos Mětška. Na jadnom pśednosku wót njogo w 1980ych lětach su jogo něgajšne wukniki jogo grono nagrawali.

Pśibytny jo był teke jogo syn, serbski komponist Juro Mětšk z Budyšyna, ze swójeju žeńskeju. Wón jo kradu gjardy był, až jogo nan se we takem zarědowanju cesći. Su grali ten wjacor teke kompozicije Jura Mětška, kótaryž płaśi ako kradu moderny komponist.