Chtož jo kśěł, jo se mógał pšawje wurejowaś. Pó programje jo publikum był pšosony do reje: kołoteptanje, šejcowa reja a slědkoju, móžoš groniś, normalna diskoteka. Grali su die Folksamen a nAund. 
Chóśebuz/Cottbus. Wjelika, wjasoła feta ze serbskim programom, z prima moderaciju a z wjelimi nowymi wósebnosćami – tak by mógali skrotka wopisaś Schadowanku na Dolnoserbskem gymnaziumje pśedslědnu sobotu wjacor.
Ku chwalenju dajo wjele. K prědnemu: ta luštna a spontana moderacija, kótaruž stej wobstarałej pśiduca serbska wucabnica (referendarka na Dolnoserbskem gymnaziumje) Colett Schampatisowa z města a študańc pšawa Wyliam Janhoefer z Brjazyny – wobej absolwenta Dolnoserbskego gymnaziuma. Wónej stej se na jawišću pódrjažnjałej, stej žortowałej a ze šykom pśez program wjadłej, wšo w serbskej rěcy, nic wótlazowane z cedlika.