Lubnjow/Lübbenau. Gaž te 1260 cłonki zwězkoweje zgromaźiny (Bundesversammlung) w Barlinju budu na 12. februaru nowego prezidenta Nimskeje wuzwólowaś, ga buźo tam teke Domowinarka Uta Henšelowa z Lubnjowa pśipódla, ak žednej partaji njepśisłuša. Wóna jo južo ako sedymlětne źowćo do Domowiny stupiła, aby serbske nałogi a tradicije woplěwała. W rozgronje z Nowym Casnikom wulicujo ta 52lětna diplomowa etnologowka, co jo ju k tomu wjadło, aby se na tej zgromaźinje wobźěliła.

Nowy Casnik: Slědny cas jo za Was był napinajucy, ale teke zwjaselecy. Wulicćo, dla cog?

Uta Henšelowa: To jo pšawje. To su byli wjelgin glucne dny za mnjo. Take něco dožywijoš snaź jano jaden raz we žywjenju. Ja som se 13. december pśedstajiła frakciji CDU w krajnem parlamentu ako zastupnica Domowiny w Dolnej Łužycy. Frakcija CDU jo měła ideju, až na tej pśiducej zwězkowej zgromaźinje dej byś teke serbski lud zastupjony. Ja som wordowała jadnogłosnje wót cełeje frakcije za tu zgromaźinu wumjenjona. To jo było rědne zacuśe a ja som była wjelgin gjarda, ako ceła frakcija jo mě naslědku pśiklaskała. To jo mě wjelgin gnuło.