Z Wjerbna/Werben. W lěśe 1992 běchu we Wjerbnje załožyli Tradicijne towaristwo, kótarež jo pón teke pśistupiło Domowinskej župje Dolna Łužyca. Hartmut Hanškac, Joachim Liske, dłujkolětny pśedsedaŕ Henry Kališ a druge su to zwónoźeli, a pśedsedaŕ tamneje Domowinskeje kupki Horst Wolk a jogo žeńska stej byłej mjazy prědnymi cłonkami. Južo pśed tym – w lěśe 1988 – běchu we Wjerbnje muskecy zapust zasej wótžywili. Z wušej 110 pórami, wšykne žeńske w serbskej drastwje, su tegdy śěgnuli pó jsy. Tak wjeliki jo był we Wjerbnje pla srjejźneje a staršeje generacije ten zajm za zgromadne zapustowanje. A z tym jo był ten wjerbański zapust zasej kompletny – z camprowanim, z młoźinskim zapustom a z muskecym zapustom za ženjonych.