Ten woblubowany kus „Sergej“ Hochoskeje źiwadłoweje kupki buźo zasej insceněrowane, a to wót budyšyńskego źiwadła. Premjera buźo 21. apryla zeger 19.30 w Hochoskem gmejnskem centrumje „Kólasko“. Pśedstajenje buźo w dolnoserbskej rěcy a ze simultanym pśe-stajenim do nimskeje rěcy.

Regina a Werner Gusor zgonijotej, až jo se w rusojskej Car Iwan ten Grozny zjawił. Mjaztym, až Werner take „zjawjenja“ ako głupy njerěch wótpokažo, źaržy jogo žona Regina take źiwy za móžne. Tak cynitej probu: Kuždy wót njeju dej z kšuteju wólu na jadnogo dawno „zajźonego“ luźa mysliś.

A co pśiźo wen? We jśpě stoj naraz rusojski wójak w połnej monturje: Sergej. Wón jo pśisłušnik garnizony, kótaraž jo blisko wjaski stacioněrowana była, nježli až jo se DDR sypnuła.

Regina a Werner jogo pśiwzejotej, slědkoju nosy Sergej teke wužytne dary, ako su w bunkeru lažecy wóstali. Z tymi by se dał dobry „handel“ wótworiś. Ale wónej musytej Sergeja pśed tšašnymi snuchlenjami wejsnego policista Erharda chowaś.