Kašubow dajo wó 300.000 do 500.000, pśi comž kašubsku rěc powěda aktiwnje wó 100.000 luźi. Wóni bydle pśedewšym w Kašubskej, pódwjacor wót Gdańska. To jo pód-zajtšny źěł Pomorskeje, kótaryž jo w nimskej historiografiji Pomorellen pomjenjony. Jich głowne wokrejsne města su: Wejherowo (na kašubski Wejrowò), Kartuzy (Kartuzë), Kościerzyna (Kòscérzna), Chojnice (Chònice), a Bytów (Bëtowò).

Wušej togo wjele jich bydli zwenka historiskego kašubskego sedleńskego ruma: W Waršawje, Gdańsku, Brüsselu a samo w kanadskej prowincy Ontario, źož jo jich wjele se pśed wójnu wupórało, pytajucy za lěpšym klěbom. Wóni bydle teke w Nimskej – 300 lět ga jo jich źinsajšny rěcny teritorium słušał k Pšuskej. Danuta Dzwonkowska ze jsy Stężyca (na kašubski Stãżëca), mólarka a wjednica žeńskecego towaristwa, měni, až Pšuske su kśěli jich z mócu do Nimcow pśeměniś.