Pódstupim/Potsdam. We bramborskich gólach jo tuchylu 21 wjelkowych rědownjow žywych, to jo tśeśi źěł wšyknych wjelkow w Nimskej. Pśez to, až wóni njetergaju jano źiwinu, ale teke zbóžo a ta škóda dlej a wěcej pśiběra, jo bramborske ministarstwo za wobswět kóńc maja prědne wjelkowe wustajenje spisało a k diskusiji prědk połožyło. We njom jo nadrobnje wustajone, kak dej se z wjelkami wobchadaś.

Nimska a europska kazń wót woplěwanja natury zakažo do wjelkow stśělaś. To dej teke tak wóstaś. Ale ministarstwo co wuwześa pśiwdaś. To grono jo wót „problemowych wjelkow“. Gaž wjelk pśiźo bližej ak 30 m k rědowni abo naspjet pśewinjo płoty a wobzacynjenja abo se do rědownje garnjo, ten dej to pšawo na woplěwanje zgubiś.