Pódstupim/Potsdam. Cas za skjaržby dla serbskego sedleńskego ruma jo slědny tyźeń wótběžał. We slědnej minuśe su dostali w Pódstupimje hyšći skjaržbu wót Ranja/Großräschen. Teke měsće Derbno/Döbern a Wjelcej/Welzow stej skjaržbu wótpósłałej. Tak stej derbjański šołta Jörg Rakete a zastupnik ze zastojnstwa we Wjelcej Casnikoju k wěsći dałej.

Peter Jeschke, šołta Derbna/Schenkendöbern, jo Casnikoju gronił, až njejsu za cełu gmejnu skjaržyli. Jano za te styri jsy, źož jo wejsna pśirada pśeśiwo tomu zgłosyła, skjarže. To su Grabk/Grabko, Pynow/Pinnow, Derbno/Schenkendöbern a Barklawa/Bärenklau. Wejsne źěle Dubojce/Taubendorf, Grano/Granow, Gósćeraz/Groß Gastrose a Kerkojce/Kerkwitz pak su za serbski sedleński rum. Slědne skjaržby pak hyšći njejo sudnistwo Ministarstwoju za slěźenje, wědomnosć a kulturu znate cyniło. Licba skjaržbow jo pótakem nejskerjej na dogromady źewjeś stupiła. Skjaržyli su južo dlej Markojska góla a Kopańce (za někotare wejsne źěle) tak ako Feliksowy jazor, Gójacki jazor a Stara Niwa-Wózwjerch.