Wót 1. julija togo lěta maju w regionalnem běrowje Domowiny w Serbskem domje w Chóśebuzu dwě nowej sobuźěłaśerce a jadnogo nowego sobuźěłaśerja.

Katrin Šwjelina, doma w Drjenowje, jo z lěta 2001, ako jo se załožył w Chóśebuzu Serbski rěcny centum Witaj, tam źěłała a se tam głownje starała za projekty gromaźe ze šulami, wuknikami a ceptarjami. Wósebnje, to se wě, z tymi serbskimi. Wóna buźo wót něnta ako pśistajona pśi Domowinje se staraś wósebnje za wšake projekty a za zgromadne źěło ze serbskimi towaristwami, ako pśisłušaju župje Dolna Łužyca. Wóna źěła za Domowinu 20 góźin w tyźenju a to jo nejpjerwjej myslone až do kóńca togo lěta. W drugej połojcy źěłowego casa – to groni teke 20 góźin wob tyźeń – nawjedujo wóna Domowinski muzej w Dešnje. Jogo doněntejšna wjednica Babett Zenkerowa ga jo za jadno lěto swój amt „wopušćiła“.