Jadno tych nejrědnjejšych łapanjow kokota we našom regionje jo to popojske. Zachopili su tam akle zasej w lěśe 2010 z tym nałogom. Ale južo wót zachopjeńka jo wjele zapalonych luźi pśipódla a niźi njedajo tak wjele žeńskich w burskej drastwje ako w Popojcach. Bejna licba žeńskich z wokolnych jsow, kótarež se wobźěliju ako gósći rowno tak w serbskej drastwje, pśiźo rad do Popojc a ma tam mjaztym dobre pśijaśelki.

Nagrono jo było zasej na nimski a serbski. A teke nowe tofle su měli, kótarež su dwójorěcne wopisane. Glědajśo na dołojcne foto.

We „zaklětem 7. lěśe“ jo bóžko jaden tych pěśoch rejtarjow z kónja padnuł a njejo mógał wót samego zasej stanuś. Chórobne awto jo młodego muskego do chórownje dowjadło. Za wšym zdaśim jo sebje złamał pór kórabjow a snaź ramje, su wulicowali. Popojske Domowinske towaristwo jo ned wobradowało, kak mógu jogo pódpěrowaś w pśiducych tyźenjach a mjasecach. Ale ku gluce njejo na kóńcu tak grozne było, ako su měli nejpjerwjej tšach. Dwě kórabi jo sebje złamał, kuždu dwójc, ale howacej jo wšykno w rěchu a w běgu tyźenja su jogo zasej domoj pušćili.