Mósćańska gmejna (Gemeinde Heinersbrück) zdychujo spód financneju nuzu. W lěśe 2012 su se zachopili tudy chude lěta – wudanki su byli wuše nježli nabrane pjenjeze. Wót togo casa až do źinsajšnego dnja jo gmejna pśez kazń nuzkana, swój etat konsoliděrowaś. Pśi tom płaśe wósebnje kšute regule za wudawanje pjenjez a za pśizwólenje etata. Šołta mósćańskeje gmejny Horst Gröschke (we tom cesnem amśe wót lěta 2008) jo Casnikoju rozkładował, kak jo ta situacija nastała a dla cogo pśiźo jim śěžko z teje nuze wujś.