Budyšyn/Bautzen. Lětosne lawreaty Myta Domowiny a Cesnego znamuška Domowiny su wordowali pócesćone pětk w Serbskem domje. Wóni su swóje wuznamjenjenja dostali z rukowu zastupnego pśedsedarja Domowiny Wylema Janhoefera a cłonkow mytowańskego wuběrka.
K lawreatam Myta Domowiny słuša Margot Hašcyna z Drjenowa, serbska ceptarka na wuměńku. Wuběrk jo cesćił jeje angažement k lěpšemu serbskego šulstwa a serbskeje wucby w Dolnej Łužycy. Wóna organizěrujo sobu serbsku olympiadu, jo cłonk pśedsedarstwa Serbskego šulskego towaristwa, źož zastupujo interese Dolneje Łužyce. Wóna pomoga w serbskich źiśownjach w Žylowje a měsće, źož hospitěrujo nanejmjenjej raz na lěto w kuždej kupce a raźi wótkubłarkam, kak mógu swóju rěc pólěpšyś. 1997 jo organizěrowała prědny kurs za wótkubłarki.Wušej togo jo cłonk dolnoserbskeje rěcneje komisije, źěła we nadawku ABCeja na ramowych planach za serbsku wucbu, jo fachowa raźiśelka w serbskich šulach. Wóna jo sobu napisała wucbne knigły a druge wucbne materialije, jo se angažěrowała za dalejkubłanja wótkubłarkow.