Marlies Nagorcyna (65) ze Slěpego jo źaseś lět cłonk towaristwa Njepilic dwór. How se cujo trjebana a derje pśiwzeta. Pśedsedaŕ Manfred Nikel (Nickel) jo wjelgin wjasoły, až ma taku angažěrowanu žeńsku w pśedsedarstwje. 
Slěpe/Schleife. Serbski kurs jo ju pógnuł. Wucabnica Cordula Jurkowa z Brězowki jo jich wucyła prědne serbske słowa, wugranjanje, tradicije a nałogi. To jo było 2004 w slěpjańskej šuli. „Wóna jo nas wucyła z wjelikim wjaselim. A tak som namakała drogu k serbskej rěcy“, měni Marlies Nagorcyna (65) ze Slěpego ze źěkownosću. Gromaźe z drugimi jo tam wuknuła górnoserbsku rěc. Pózdźej, we starej šuli w Rownem, jo wuknuła pla wucabnice Antje Krawcoweje z Chóśebuza teke slěpjańsku serbsku rěc. Pśez Rudi Krawca, ak jo 1999 słušał k tym sedymjom załožarjam Njepilinego towaristwa, jo namakała naslědku drogu k tomu towaristwu.
Diese Seite drucken