W organizaciji Waršawskeje uniwersity a jeje wótźělenja „Artes Liberales“, Leidenskeje a Londonskeje uniwersity jo se wót 15. do 16. nowembra wótměła we Waršawje konferenca „Wobgrozone duchne wědomnosći: zachowanje a rewitalizacija wobgrozonych rěcow a kulturnego derbstwa“. Na toś tom swětowem zmakanju mjeńšynow su wordowali pśed wěcej ako 60 pśisłucharjami pśedstajone z boka teoretikarjow a praktikarjow-rěcywědnikow, archiwistow, psychologow, antropologow a etnologow wuslědki a gibanja k rewitalizaciji a dokumentaciji mjeńšynowych rěcow ze wšyknych kontinentow. Nahuatl, słowakske huncokari, iršćina, wilamojska rěc, łemkowšćina, sachalinska rěc Nivkh, dagestanska rěc Širi, oksitanšćina a dakorumuńšćina su jano někotare z rěcow a jim pśisłušne ludy, kótarež su stojali w srjejźišću konference. Wósebnje zajmny jo był referat psychologa Bena Lévine z Kanady, kenž jo źěłał z maminorěcnymi francojskeje rěcy w kanadskej prowincy Maine, kótarež su byli nuzkane wopśestaś powědaś francojski.