Pśed dwěma tyźenjoma pětk jo janšojska Domowinska kupka pśepšosyła do kjarcmy „K lipje“ na swóju kulturnu woklapnicu – to groni, w Janšojcach nic šołta, ale Domowinarje su tudejše towaristwa a institucije pśepšosyli, aby z pomocy fotow zachadne lěto a wažne zarědowanja we jsy wobspomnjeli.

Na zachopjeńku wjacora su spominali na 6 zamrětych slědnego lěta a wuwitali 5 nowonaroźone góletka we jsy. Teke 9 nowych wobydlarjow, zwětšego młode familije, jo se pśedstajiło a wóni su se pó starej tradiciji z piwom do wejsneje zgromadnosći zakupili.