Lube źiśi,

no, kak se Wam źo? Ja som slědny tyźeń chóra była. W póstolce som lažała. Žednu „pšašatu rěpu“ njejsom mógała pisaś.

Ale něnto se mě lěpjej źo a ja cu Wam nowe serbske knigły pśed-stajiś. Napisała jo je Majka Štockowa. Katja Höchsmannowa jo kresliła ilustracije k tomu. Na našom wobrazu su wóni wiźeś. We nich stej dwě tšojeni. To prědne jo „Gódowny dar“. To druge jo „Janźelik z klinkotkom“. Myslone su knigły za źiśi wót 3- 5 lět.

Wó co źo we tšojeńkoma? No, we srjejźi prědnego wulicowańka stoj źowćko Lydija. Lydija žycy sebje něco ku gódam. To my wšykne cynimy, nic ga? Ale wóna se nježycy słodkosći abo droge grajki. Ně, wóna žycy sebje něco rědnego za ceły swět. Wěcej ale njok Wam pśeraźiś!