Ze Šćeńca/Steinitz bei Drebkau. Zastojniki, amtarje, wótpósłane a druge interesěrowane wobydlarje – nagromadu 11 luźi – su stwórtk tyźeń tudy na Sćeńcańskem dwórje serbsku rěc wuknuli. Zachopjeńkarski kurs za nje jo pśigótowała Šula za dolnoserbsku rěc a kulturu. Wjednica šule Uta Henšelowa jo jich połtera štundy wucyła prědne słowa, wugranjanje, witanje, źěkowanje a druge nadobne a pśistojne grona, z kótarymiž móžoš se na serbske drugim luźam pśigroniś. Wšykne su se wjelgin pilnowali.

Paul Köhne, pśedsedaŕ měsćańskeje zgromaźiny wótpósłanych w Drjowku a kandidat za amt šołty drjowkojskeje gmejny, jo nam gronił, až naglěda ten kurs ako wažnu kšoceń pśi zeźaržanju serbskeje identity, kultury a rěcy w drjowkojskich stronach.

Pódla zastojnikow a wótpósłanych měsćańskeje zgromaźiny su se teke priwatne paršony wobźělili. Angela Krohnowa z Kózlego jo pśišła, dokulaž co móc lěpjej rozměś, co wuknjo jeje syn, wuknik na Dolnoserbskem gymnaziumje.