Z Noweje Łuki pla Wórjejc/Neuwiese. Iniciatiwa za Serbski sejm stupa dalej pó swójej droze. Wóni kśě lětosa nazymu pśewjasć wuzwólowanje do serbskego „pśedparlamenta“. To su wóni wobzamknuli na wobradowanju pśed dwěma tyźenjoma we jsy Nowa Łuka (Neuwiese) pla Wórjejc.

Pśez to, až statne institucije njejsu jim na jich póžedanje žednu aktiwnu pódpěru dali, ga licy iniciatiwa z tym, až prědne wótpósłane Serbskego sejma budu źěłaś kompletnje we cesnem amśe. Zaprědka njebuźo wóny parlament žedne pšawa daniž kompetence měś. Wšykne politiske a zastojnske kompetence, kaž teke status korporacije zjawnego pšawa a kulturnu a šulsku awtonomiju, budu musaś sebje akle póněcom wupominaś. „Weto buźo to wót wšogo zachopjeńka połnogódne demokratiski legitiměrowane zastupnistwo serbskego ludu, forum, źož serbski lud móžo ze sobu we wšyknych wažnych nastupnosćach transparentnje diskutěrowaś“, cyni iniciatiwa znate.