Z Hochoze/Drachhausen. Jadnab 25 pśiglědari jo pětk tyźeń wjacor pśišło do gmejnskego centruma Kólasko na premjeru kusa „Wjelika wutšoba“ Nimsko-serbskego źiwadła z Budyšyna.

K wósebnym gósćam togo wjacora stej słušałej režiser Claus Tröger ze Salzburga a wugótowaŕ jawišća Klaus Gasperi z Brunecka w Pódpołdnjowej Tyrolskej, ako stej ekstra do Hochoze pśijěłej płody swójogo źěła wót někotarych tyźeni woglědat. A rowno tak intendant budyšyńskego źiwadła Lutz Hillmann a někotare młode, nimske elewy (wuknjeńce źiwadła), kótarež su dejali serbsku inscenaciju dožywiś a na ten part raz nazgóniś, co jich serbske kolegi gótuju.

*

Pśiglědarje su sobu culi emocije na jawišću: gaž Jojo (Jurij Šiman) jo sćakły na bosa swójeje kliki. Gaž co wót boksarja Lea wuknuś, swóje pěsći pšawje nałožowaś... Gaž njejo skobodny dosć, jadnomu źowćoju lubosć wopokazaś. Leo (Jan Mikan) jomu pomoga a raźi, tak až naslědku spórajo zasej swójo žywjenje pód kontrolu.