Z Dešna/Dissen. 39lětny Nico Jarik, kótaryž jo ako pśedsedaŕ 12 lět wjadł dešańske sportowe towaristwo SV Grünweiß Dešno, jo gano na zgromaźinje towaristwa swój amt pśepowdał naslědnikoju. Ten nowy jo teke jaden Nico, Nico Kosak, balokopaŕ, lěto młodšy ako jogo pśedchadnik. Pśijaśele gronje pak jomu zwětšego „Paul“. To pśimě stoj teke na jogo nowem t-shorśe, ako nowe pśedsedarstwo towaristwa jo gano dostało.

„Ja budu dalej z dobreju radu a statkami našomu towaristwoju ako cłonk pśedsedarstwa słužyś a pomogaś. Ja pak som hyšći we styrich drugich towaristwach a organizacijach we cesnem amśe aktiwny, a dla tog som našym sportarjam južo pśed mjasecami zjawił, až budu mój amt dla mało casa wótedaś. Familija ga pomina teke swójo pšawo na mnjo. A ja som měł wěstosć, až naš Paul, ako jo dosegnuł wu nas mjaztym tu ‚staru ligu‘, buźo to wšo derje zwónoźeś“, jo Jarik nam gronił.