Chóśebuz/Cottbus. Jadna diskusija, kótaraž jo luźi rozbuźiła, jo była 18. junija w serbskem internaśe w Chóśebuzu. W ramiku diskusijow rěda „JO!ZATEBJE“ jo Rěcny centrum Witaj (RCW) pśepšosył na rozgrono ze starjejšymi. Ako moto su wustajili „Niedersorbische Sprache – ja, aber (nicht zu) viel!“

Starjejše su pśišli we dobrej licbje wót pśisamem 20 luźi. A teke ceptarje Dolnoserbskego gymnaziuma (DSG), wótkubłarje a zastupniki serbskich institucijow, tak až jo jich było dogromadu wušej 40 luźi.

Daś jo nejpjerwjej wobspomnjety kóńc togo wjacora (ako jo trał dwě a poł góźiny): Wětšy part wobźělonych jo šeł njespokojom a wobtužony domoj.We diskusiji stej se pokazałej dwě měnjeni, kótarež stej se zdałej młogim zgromaźonym we tej diskusiji ako njewujadnanej.

Zastupny wjednik RCW Viktor Zakar, moderator zarědowanja, jo na zachopjeńku swójo měnjenje wót togo zjawił, co z jogo wiźenja rewitalizacija jo. Až trjebaju rěcne rumy zwenka wucby, až dej se konsekwentnje serbski powědaś a až dej byś wótgranicowanje. Rěc wětšyny – pótakem nimska – dej byś tam wuzamknjona.