Z Chóśebuza/Cottbus. Komponist a muzikowy wědomostnik Bernd Weinreich z Chośebuza jo swěśił cora, 3. julij, swój 70. narodny źeń. Wón jo se naroźił w Złem Komorowje a jo we starstwje pěśich lět chopił wuknuś graś na klawěrje, pózdźej na wiolinje a wioli. Ako wuknik jo grał sobu w ansamblach a kupkach za komornu muziku. Južo ze 14 lětami jo sebje pśiswójł šyroke wěźenje we komponěrowanju, kótarež jo nejpjerwjej awtodidaktiski dalej wuknuł. Ako jo był 18 lět stary, jo skomponěrował za wukniki Złykomorojskeje muzikoweje šule prědnu kompoziciju za smyckarski kwartet. Na Lutherowej uniwersiśe w Halle/Wittenbergu jo 1973 wuspěšnje dokóńcował studium ako diplomowy muzikowy wědomnostnik.