Z města Carhaix (Karaez) w Bretoniskej. Pśed dwěma tyźenjoma smy pisali, až 15 wuknikow tudskego Diwan-gymnaziuma jo wótpołožyło pisne abiturne pśespytowanje we matematice na bretoniski, rownož šulski amt jo jim pjerwjej zjawił, až njebuźo bretonisku rěc pśipóznaś. Amt jo jim pśipowěźeł, až wótrězki pisnego źěła, kótarež budu we bretoniskej rěcy spisane, njebudu se korigěrowaś.

Francojski powěsćowy portal 20miutes pišo něnto, až 12 wót nich su pśespytowanje wobstali, dwa dejtej jo hyšći raz pisaś, a jaden jo pśepadnuł. Abiturienty su se naslědku źiwowali swójim censuram, a gódaju, až korektory su za wšym zdaśim jich źěła normalnje korigěrowali, snaź pśeśiwo wóli ministarstwa. To pak se hyšći njewě, a teke nic, kak daloko jo bretoniska rěc jim we cełem censuru skazyła.

Gymnaziasty su z ciwilneju njepósłušnosću kśěli wobwěsćiś swójo póžedanje, až bretoniska rěc dej byś pśiwdana ako rěc abiturnych pśespytowanjow.