Z Chóśebuza/Cottbus. Južo wěcej lět organizěrujo Rěcny centrum Witaj (RCW) mytowanje za młodostnych, kótarež se angažěruju za serbsku rěc. A to jo se stało zasej lětosa 13. septembra. 10 młodostnym jo wugronił Viktor Zakar we mjenju Witaj-centruma, ale teke dalšnych serbskich institucijow swój wjeliki źěk a jo jim pśepódał wopismo a dar.

Ako južo w slědnych lětach, su nejpjerwjej cołnowali pó Sprjewi w Chóśebuzu. Bóžko njejo było lětosa wjelike wobźělenje z boka serbskich institucijow. Mimo Witaj-centruma jo pósłała jano Załožba za serbski lud jadnu zastupnicu. Wina na tom pak njejo małki zajm institucijow, ale až jo była rowno na tom dnju wjelicka konferenca Domowiny we Złem Komorowje. Wobźělenje na dwěma zarědowanjoma njejo móžne było.