Z Bórkow/Burg. Tudejše Domowniske a drastwine towaristwo jo sobotu tyźeń na roli Wilfrieda Baronika njedaloko Błośańskeje termy pokazowało, kak su pjerwjej kulki kopali (w Bórkowach gronje knydle). Na jaden part su to cynili kólenkujucy, z ruku a kopawku, a na drugi part „pó modernjejšem“, z kulkikopawu (Kartoffelroder), kótaruž jo kóń śěgnuł. Nico Skotarek jo togo kónja spśěgnuł, a z nim teke jadno akle połlětne žrěbje. Zas a zas su te zechylone kulkikoparki a koparje se wurownali, swóje drjewjanki na bok śisnuli, a su we štrumpach šli rejowat polku a rheinländarja. Pódla togo delanego špundowanja jo šesć žeńskich pśi šesć pjacykach pjakło wójadnom kulkowe mlince ‒ weto su gósći musali pśisamem jadnu štundu stojaś. Mlince jěsć ned pśi tych kulkowych zagonach, źož te kulki su rowno wordowali wukopane ‒ to jo było južo wósebna wěc, a dla tog su luźe byli zwólne tak dłujko we smuze stojaś. Bernd Konrad, pśedsedaŕ bórkojskego towaristwa, jo gronił: My smy našym pomogarjam wjelgin źěkowne, wósebnje žeńskim, ako su južo prědku wen wjeliku licbu tykańca napjakli!“